Dr James Earl „Jimmy“ Carter Jr. (* 1. Oktober 1924 z Plains, Georgia) isch e US-amerikanischer Politiker vo de Demokratische Partei. Er isch zwüsche 1977 und 1981 de 39. Presidänt vo de Vereinigte Staate gsy. Vorhär hät er vo 1971 bis 1975 Gouverneur vo Georgia gwürkt. Er isch au als Bsitzer vonere Nuss- und Baumwulleplantage und gläubige Baptischt bekannt worde.

I synere Amtszyt het dr Carter d Torrijos-Carter-Verträg zur Übergab vom Panamakanal abgschlosse und isch maßgäblich a de Verhandlige zum Abkomme vo Camp David I beteiliget gsy. Er het de SALT-II-Vertrag mit de Sowjetunion und het diplomatischi Beziehige zur Volksrepublik China ufgnuu, wo scho unter sym Vor-Vorgänger Richard Nixon usghandlet worde sind. S Ändi vo synere vierjährige Amtszyt isch vo de Islamische Revolution im Iran, de Bsetzig vo der amerikanische Botschaft z Teheran dur radikali iranischi Studänte und em Usbruch vom sowjetische Afghanistanchrieg prägt gsy.

Innepolitisch isch er vor allem i de Energy-, Bildigs- und Umwältpolitik engagiert gsy. Er hets aber nid gschafft, d USA us ihrere Wirtschafts- und Gsellschaftskrise z füehre.

S Schytere i der Inne- und Ussepolitik het dezue gfüert, dass er nach einere Amtsperiode vom Republikaner Ronald Reagan abglöst worde isch.

Syt 1981 engagiert sich de Carter mit sym Carter Center vor allem für Mänscherächt, die internationali Vermittlig und Wahlbeobachtig. Defür het ihm s Nobelkomitee 2002 de Fridesnobelprys zuegsproche.

 Commons: Jimmy Carter – Sammlig vo Multimediadateie