Dä Artikel behandled a Gmaende en Bada-Wirddabärg. Weidore Bedeidonge fendet mor onder Jettingen.

Wappa	Deitschlandkart
	48.5758333333338.8008333333333559Koordinate: 48° 35′ N, 8° 48′ O
Basisdata
Bundesland:	Bade-Wirttebärg
Regierongsbezirk:	Stuegert
Landkroes:	Beblenga
Heh:	559 m i. NHN
Fläch:	21,1 km²
Eiwohner:	8207 (31. Dez. 2022)[1]
Bevelkerongsdicht:	389 Eiwohner je km²
Boschtloetzahl:	71131
Vorwahl:	07452
Kfz-Kennzoeche:	BB
Gmoedsschlissel:	08 1 15 053
NUTS:	DE112
Adress vo dr Gmoedsverwaltong:	Albstraße 2 71131 Jettingen
Webpräsenz:	www.jettingen.de
Schuldes:	Hans Michael Burkhardt
Lag vo de Gmoed Jettingen (Baden-Württemberg) em Landkroes Beblenga

Jeddenga (veraltet Ìadenga, dt. Jettingen) isch a Gmaende em Landgraes Beblenga en Bada-Wirddabärg.

S´ heidige Jeddenga sezzd sich zsẽma aus Oborjeddenga ond Ondorjeddenga. Emmor schao zu Ondorjedenga ghaerd hådd dor gloene Weilor Sendlenga (Sindlingen), sodass Jeddenga drei Ordsdåel håd. Obor- ond Ondorjeddenga send emmor scho wenichor als oen Kilomedor ausanandor gwaä. Dådurch dass ogfär ab 1990, no ondorm Birgormåeschdor Dieterle, en dor Midde zwischa Obor- ond Ondorjeddenga viil baud wårda isch, send dia båede Ordsdåel jezzd midenandor vorbonda. En dor nuia Ordsmidde liged s´ nuie Rådhaus, d´ Haobdschul, d´ graosa "Schwabenhalle" ond a graesors Pflegehaem, s´ "Franziska-von-Hohenheim-Stift".

Jeddenga hådd därzeid ibor 7500 Aewonor, ond isch ganz uff dor Raom Beblenga/Sendlfenga ausgriichd. En Jeddenga sälbor geid´s ibor 1200 Arbeidsblätz. Wäaga saenor graosa Gmarkong hådd´s emmor no gnuag Blatz fir om de 20 landwirdschaffdliche Vollerwerbsbedrib, vordåeld uff Sendlenga, s´ Efele (Öfele), d´ Hehahef (Höhenhöfe) ond s´ Emadaal (Imental).

Vom Dialäggd här ghaerd Jeddenga zom westschwäbischen Bereich. A bsondors Mergmal isch, dass d´ alde Jeddengor "veil" saged sdadd "viil" (viel).

Mor gåd dorvo aus, dass´s ganz am Ãfang on "Uoto" a "Uotingen" grended hådd. Sae Sidlong isch wahrschaenlich em Gwann "Stöchach" gläaga gwäa. Om 700 n. Chr. rom isch dui aersd Sidlong uffgäbba wårda, mor wåes blos edd mårom. Nerdlich dorvo isch Oberjeddenga endsdanda, sidlich dorvo Ondorjeddenga. Zom 1. Dezembor 1971 hend sich båede Flägga freiwillich zsẽmagschlossa, ond so isch widor beianandor, wa ganz am Ãfang scho amål beiandandor gwäa isch.

Mid dor frenggischa Eroborong send d´ Alemanna christianisird wårda. Fir d´ Frangga isch tipisch, dass-se efdors a Martinskirch, a Michaelskirch, a Mauritiuskirch ond a Mariakirch zsẽma grended hend. Uff Jeddenga ãgwended: D´ Martinskirch sdåd en Oborjeddenga, d´ Michaelskirch en Ondorjeddenga, d´ Mauritiuskirch en Sendlenga, ond d´ Mariakirch vormuadded-mor en-ra aagangena Sidlong en dor Nähe vo de Aussidlorhef em "Öfele".

Jeddenga leid ã dor B28 vo Reidlenga/Dibenga ibor Nagld/Fraedasdadd nåch Sdråßburg. Oborjeddenga hådd laang omdorm sdarga Vorkehr glidda, bis 2012 endlich d´ Ongejongssdråß om Oberjeddenga rom ferdichgsdelld wårda isch. Dor Flägga gaherd zom "Verkehrsverbund Stuttgart" (VVS). S´ geid a ausgezaechneda Omnibusvorbendong nåch Härrabärg (Herrenberg), dord mid-ma diräggda Ãschluss ã S-Bã-Linie S1 nåch Sduagord ond ã d´ Gaebã (Gäubahn) Richdong Bodasee ond bis nåch Zirich.

Jeddenga hådd sich mid de Gmaendena Bõdorf (Bondorf), Gaefelda (Gäufelden) ond Metzenga (Mötzingen) zom Gmaendevorwaldongsvorband „Oberes Gäu“ mid Sitz en Gaifelda zsẽmagschlossa.

Birgermåeschdor isch dor Hans Michael Burkhardt.

Ergäbnis vo de Landdagswahla seid 2006:^[2]

¹ 2006: WASG, seid 2011: Die Linke

 Commons: Jettingen (Baden-Württemberg) – Sammlig vo Multimediadateie

• www.jettingen.de

1. ↑ Statistisches Landesamt Baden-Württemberg – Bevölkerung nach Nationalität und Geschlecht am 31. Dezember 2022 (CSV-Datei).
2. ↑ Statistisches Landesamt Baden-Württemberg: Landtagswahl (Memento vom 7. Juli 2019 im Internet Archive)