Dr sibti Daag vom jüüdische Pilgerfest Sukkot, dr 21. Daag vom Monet Tischri, isch bekannt as Hoschana Rabba, surbtalerjiddisch Houschaane Rabe (vo aramäisch הושענא רבה „groosses Hoschana“; „hoschana“ bedütet übersetzt „So hilf doch“!).

An däm Daag git s e bsundrige Gottesdienst in dr Sünagooge, dr „Hoschana Rabba“, wo mä drbii siibe Umgäng (Hakkafot) mit em Lulav macht. Es isch üüblig, ass mä wääred dere Prozessioon d Torarolle us em Toraschrank uuseholt. Es git e baar Gmäinde, wo mä noch jedem Umgang in s Schofar bloost.

Hoschana rabba isch dr sibti Daag vo Sukkot und dr letschti Daag vo de „hooche Fiirdig“. Noch dr jüüdische Kabbala isch s dr Daag, wo d „Zeddel in Himmel“ gschickt wärde, zum s Urdäil, wo Gott gfellt het und wo für jeede Juud für s ganze Joor druf festgläit isch, villicht doch no z beiiflusse. Im Raame vo dere Dradizioon wünscht jede em andere „e guets Zeddeli!“ oder, wie mä uf Jiddisch säit, „a gutt Kwittel!“

Am Morge vo Hoschana Rabba stoot dr Vorbäter im ene wisse Chittel vor em Toraschrank genau wie am Nöijoorsfest und am Versöönigsdaag. Mä macht siibe Rundgäng (Hakafot) in dr Sünagooge mit äinere oder meerere Torarolle und mit em Lulav bzw. en vier Arte, as Sümbool für d Befreijig vom Schlächte. Noch de siibe Hakkafot chunnt s rituelle Schloo mit de Wiidezwiig: Mä duet die vier Arte uf d Site und nimmt e Grubbe vo fümf Bachwiidezwiig, wo zämmebunde si, in d Hand. Wenn mä mit em Kaddisch fertig isch, schloot mä mit de Wiidezwiig fümfmol uf e Boode oder uf e Stuellääni. Denn gheit mä sä an e Blatz, wo niemer cha uf sä stoo. Noch em dradizionelle Verständnis isch dr Köönig David am Daag vo Hoschana Rabba z Gast. Wäge däm liist mä am Oobe vo Hoschana Rabba Värs, wo mit em Köönig David zämmehänge.

Lueg au

• Sukkot

Weblingg

 Commons: Hoschana Rabba – Sammlig vo Multimediadateie

• Hoschana Rabba bei Chabad.org (engl.)
• Hoschana Rabba auf myjewishlearning.com (engl.)

Dä Artikel basiert uff ere fräie Übersetzig vum Artikel „Hoschana_Rabba“ vu de dütsche Wikipedia. E Liste vu de Autore un Versione isch do z finde.