Dr Georg Salvamoser (* 2. Februar 1950 z Garmisch-Partenkirchen; † 21. Septämber 2009 z Fryburg) isch e dytsche Unternämer un ain vu dr Pionier vu dr dytsche Solarenergybranche gsii.

Noch em Realschuelabschluss un eme Studium vu dr Wirtschaftsinformatik uf em Zweete Bildigswääg het er zeerscht bi Kawasaki Motors, dr Schoggifabrik Gubor un elf Johr as chaufmännische Wäärchlaiter vum Feertighuusunternäme OKAL gschafft. Anne 1991 het er si z Fryburg – zäme mit syre Frau un unterstitzt vum Alfred T. Ritter, em Änkel vum Schoggihärsteller Alfred Ritter (Ritter Sport) – mit em Kapital us em Verchauf vu sym Huus sälbschtständig gmacht un het en Handwäärchsbedriib fir d Montage vu Solarstroomanaalaage grindet, d Solar-Energie-Systeme GmbH (SES). Dur däre ire wirtschaftlige Erfolg het er anne 1998 dodrus, au z Fryburg, d S.A.G. Solarstrom AG chenne grinde, wu die Solarstromaalaage finanziert, böue un bedriibe het. Im Mai 1996 het dr Salvamoser, wider z Fryburg, d Solar-Fabrik grindet, dr eerscht Bedriib z Dytschland, wu Solarstroom-Modul härgstellt un nit zue me Kunzärn ghert het. D Finanzierig isch unterstitzt wore dur iiber 100 stilli Gsellschafter, s Know-how het dr Salvamoser dur Kooperation mit dr US-amerikanische Spire Corporation iberchuu. Dr Salvamoser het d Solar-Fabrik, wu as GmbH grindet woren isch, ohni effetligi Subväntione zue re internationale Aktiegsellschaft ufböue, wu si an dr gsamte Wäärtschepfigschette lang engaschiert un syter 2002 an dr Beerse notiert isch. Bis Ändi 2006 isch er Vorstandsvorsitzer vum Unternäme gsii, wu zum 30. Juni 2015 dr Bedriib yygstellt het.^[1] Zletscht isch dr Salvamoser Inhaber un Gschäftsfierer vun ere internationale Unternämesberotig fir erneierbari Enrgie mit Sitz z Fryburg gsii.

Derzue het dr Salvamoser verschideni Organisatione un Inschtitutione im Beraich vu dr erneierbare Energie grindet. Vu Novämber 2007 bis zue sym Dood isch dr Salvamoser Bresidänt vum Bundesverband Solarwirtschaft (BSW-Solar) gsii.

Anne 2013 isch s Tächnologyzäntrum Fryburg (TZF) noch em Salvamoser gnännt wore.^[2]

• 1996: zäme mit dr Solar-Fabrik uuszaichnet bim bundeswyte Wettbewärb „Photovoltaik in Gebäuden“ vum Bundesminischter fir Bildig un Forschig in Zämenarbet mit em Bund vu Dytsche Architäkte
• 1997: Eurosolar-Bryys 1997
• 1998: Umwältbryys vu dr Bundesstiftig Umwält fir Laischtige in dr Photovoltaik
• 1999: Bryysdreeger bim Energy Globe Award
• 2000: Em Salvamoser sy Solar-Fabrik isch Laitprojäkt vum wältwyte Expo-2000-Exponat „Solarregion Fryburg“ un dr Dytsche Bundesstiftig Umwält. Im Rame vu dr „Ideewäärchstatt Dytschland“, ere Sammlig vu Porträtbischte vu innovative dytsche Persenligaite im Dytsche Pavillon vu dr Expo 2000, wird au dr Georg Salvamoser as vorbildlige Unternämer zaigt
• 2003 un 2005: Finalischt bim Wettbewärb „Entrepreneur vum Johr“
• 2007: Wirtschaftsmedaille vum Land Bade-Wirttebärg

• Websyte vum Georg Salvamoser Bryys, wu vu dr Georg-Salvamoser-Stiftig un dr Stadt Fryburg i.Br. uusegee wird
• [1]
• Der Sonnenkönig, Der Spiegel special vom 1. Juli 1999

1. ↑ Wirtschaft: Solarmodulhersteller: Freiburger Solar-Fabrik stellt ihre Produktion ein - badische-zeitung.de. Abgruefen am 18. Juni 2015. 
2. ↑ Zum Gedenken an Solarpionier und Vorzeigeunternehmer Georg Salvamoser: Technologiezentrum Freiburg erhielt neuen Namen. Abgruefen am 22. April 2017. 

Dä Artikel basiert uff ere fräie Übersetzig vu dere Version vum Artikel „Georg_Salvamoser“ vu de dütsche Wikipedia. E Liste vu de Autore un Versione isch do z finde.