Dr Franz Josef Kuhnle (* 27. April 1926 z Raverschburg; † 4. Februar 2021 z Dettnang) isch e dytsche remisch-kadolische Gaischtlige un Weihbischof vu dr Diezese Rauteburg-Stuegert gsii.

Dr Franz Josef Kuhnle isch no vor sym Abitur mit sibzee zur Wehrmacht yyzoge wore. Im Merz 1945 isch er in franzesischi Chriegsgfangeschaft grote un isch no verschidene Iberstellige in verschideni Chriegsgfangenelager uf Chartres chuu. Dert sin dytschsprochigi Prieschter un Seminarischte interniert wore. Dr Kuhnle isch as Seminarischt in s Kadolisch Prieschterseminar yydrätte, s sognännt „Stacheldrohtseminar“ z Le Coudray bi Chartres, un het dert Theology un Philosophy bim Abbé Franz Stock studiert.^[1] No dr Rugchehr us dr Chriegsgfangeschaft het er sy Studium an dr Universidet Dibenga abgschlosse, wun er au 1951 Mitglid vu dr kadolische Studänteverbindig AV Cheruskia Dibenga im CV woren isch.

Dr Kuhnle het am 20. Juli 1952 dur dr Rauteburger Bischof Carl Joseph Leiprecht^[2] z Ellwang d Prieschterwei empfange. Är isch derno Vikar z St. Petrus Canisius z Fridrichshafe wore. Derno isch er zum Repetänt im Konvikt z Rautweil ernännt wore. Im Aaschluss isch er Diezesanjugedseelsorger z Wernau wore. Sy eerschti Bfaarstell het er z Kinzelsau kriegt, wun er unter anderem d Bfaarchilche St. Paulus realisiert het. Anne 1969 isch er Stadtbfaarer un Dekan mit Sitz z St. Fidelis wore.

Am 13. Oktober 1976 het en dr Papscht Paul VI. zum Titularbischof vu Sorres un Weibischof vu dr Diezese Rauteburg-Stuegert ernännt. Am 27. Novämber 1976 het em dr Bischof Georg Moser in dr Konkathedrale vu dr Diezese Rauteburg-Stuegert, dr Domchilche St. Eberhard z Stuegert, d Bischofswei gspändet. Mitkonsekratore sin dr Altbischof Carl Joseph Leiprecht un dr Weibischof Anton Herre gsii. Sy bischefli Motto isch Gott isch drei gsii. Noch em Dod vum Bischof Georg Moser 1988 het dr Kuhnle d Diezese Rauteburg-Stuegert ai Johr lang kummissarisch glaitet.

Am 7. Novämber 1990 het dr Papscht Johannes Paul II. sy Ruggdritt aagnuu. Derno het er no ne Zytlang wytergwirkt, zeerscht as Bfaarer vu zwoo Gmaine im Allgai un vu 1997 bis 2018 as Gaischtlige im Ruestand. Är het z Oberzell bi Raveschburg gläbt, zletscht in eme Bflääghaim u Dettnang.^[3] Aafangs Februar 2021 isch dr Kuhnle im Alter vu 94 Johr gstorbe.^[2][4]

• Verdienschtorde Pro Merito Melitensi (Großchryz pro piis meritis) vum Souveräne Malteserorde^[5]
• Verdienschtorde vum Land Bade-Wirttebärg

• Yytrag zue Franz Josef Kuhnle uf catholic-hierarchy.org (englisch)
• Yydrag zue Franz Josef Kuhnle uf gcatholic.org (englisch)

1. ↑ Franz-Josef Kuhnle. témoin historique. In: maison-heinrich-heine.org. Abgruefen am 4. Februar 2021 (französisch). 
2. ↑ ^{2,0 2,1} Markus Waggershauser, Thomas Brandl: Gottesmann mit Charme und Begeisterung. In: drs.de. 5. Februar 2021, abgruefen am 5. Februar 2021. 
3. ↑ Franz Josef Kuhnle wird 94. In: Schwäbische Zeitung. 5. Mai 2020, abgruefen am 5. Februar 2021 (uf pressreader.com). 
4. ↑ Tobias Glenz: Rottenburger Weihbischof Franz Josef Kuhnle gestorben. In: katholisch.de. 5. Februar 2021, abgruefen am 5. Februar 2021. 
5. ↑ Nachruf. (pdf; 1,2 MB) In: Malteser Magazin. 3/19, 13. September 2019, S. 15, abgruefen am 4. Februar 2021. 

Dä Artikel basiert uff ere fräie Übersetzig vu dere Version vum Artikel „Franz_Josef_Kuhnle“ vu de dütsche Wikipedia. E Liste vu de Autore un Versione isch do z finde.