Fisibach
Basisdate
Staat:	Schwiiz
Kanton:	Aargau (AG)
Bezirk:	Zurzach
BFS-Nr.:	4306i1f3f4
Poschtleitzahl:	5467
Koordinate:	673033 / 26832247.561558.40905382Koordinate: 47° 33′ 42″ N, 8° 24′ 33″ O; CH1903: 673033 / 268322
Höchi:	382 m ü. M.
Flächi:	5.77 km²
Iiwohner:	582 (31. Dezämber 2022)[1]
Website:	www.fisibach.ch
de Fisibach, s Chileli und dehinder s Dorf
Charte
w

Fisibach isch e Gmeind im Bezirk Zurzi vom Schwiizer Kanton Aargau.

Fisibach ligt am Hochrhy und a dr Landesgränze zwüsche dr Schwiiz und Dütschland und a dr Kantonsgränze zwüschem Aargau und em Kanton Züri. Dr Gmeindbann isch also ganz im Nordoste vom Aargäu, und er goot um s chlyne Stadtgebiet vo Chaiserschtuel ume, wo uf dr Südsyte vo dr Rhybrugg ligt.

S Dorf Fisibach sälber isch öppe en Kilometer vom Rhy wäg. Äs ligt am Bach, wo dr glych Name hed und us de Jura-Hügel südlech vom Dorf abe in Rhy flüsst. Im Weste goot s Gmeindgebiet bis zum Rietbuck.

D Nochbrgmeinde vo Fisibach sind Hohentenge nördlech vom Rhy, im Landchreis Waldshüet vo Bade-Württeberg, und südlech vom Rhy Chaiserschtuel, Siglischdorf, Wyslikofe und Rümike im Aargäu und Weich und Bachs im Züribiet.

Bi Fisibach hed me am Rhyufer d Räschte vo-m-ene Wachdurm gfunde, wo d Römer im vierte Joorhundert zäme mid vilne andere sötige Dürm a dr Rhygränze ufgrichtet hend.

S Dorf chunt s erste Mol mid dr Schrybwys Fusibach in ere Urkunde us em Joor 1050 vor. Spöter hed s Nider-Visibach gheisse, zum s z unterscheide vo Obervisibach, wo hüt zu Bachs ghört.

Im Middelalter isch uf ere Insle im Rhy d Burg Schwarzwasserstelz bout worde. De Here, wo uf dere Burg gwoont hend, hed die nideri Heerschaft übr Fisibach ghört. Der Landesherr isch i däm Gebiet dr Bischof vo Konschdanz gsi. Wo d Eidgnosse ane 1415 dr Aargau eroberet hend, isch Fisibach is Amt Chaiserschtuel cho, wo en Deil vo dr Grofschaft Bade gsi isch. 1798 isch do drus dr Kanton Bade gmacht worde, und sid 1803 ghörd s ganze Zurzibiet zum Kanton Aargau.

Am 1. Augschde 1876 hed die Schwiizerischi Nordostbaan d Linie vo dr Ysebaan em Rhy no, d Ysebaanstreki vo Winti uf Choblez i Betrib gno. Vo Fisibach us sind s zwei Kilometer wyt bis zum nöchschde Baanhof, däm vo Weich und Chaiserschtuel.

Uf dr Rhyinsle, gad bi de Mündig vom Fisibach in Rhy ine, isch di ehemolige Burg Schwarzwasserstelz ane 1875 abbroche worde. Dört druf hed d Schwiizer Armee im Zwöite Wältchrieg, zum d Gränze z schüze, en Bunker härebout, wo s hüt no git.

• H. Bucher, C. Oertli-Cajacob: Fisibach – ein Dorf und seine Geschichte. Fisibach, 1995.

 Commons: Fisibach – Sammlig vo Multimediadateie

• Website vo dr Gmeind Fisibach
• Andreas Steigmeier: Fisibach In: Historisches Lexikon vo dr Schwiiz.

1. ↑ Ständige Wohnbevölkerung nach Staatsangehörigkeitskategorie, Geschlecht und Gemeinde, definitive Jahresergebnisse, 2022. Bei späteren Gemeindefusionen Einwohnerzahlen aufgrund Stand 2022 zusammengefasst. Abruf am 5. September 2023