Basisdate
Bundesland:	Tirol
Verwaltigssitz:	Raete
Flächi:	1.236,82 km
Yywohner:	31.967 (31. Dezämber 2008)
Bevelkerigsdichti:	36 Yywohner/km²
Kfz-Chännzeiche:	RE
Website:	Bezirkshauptmannschaft Raete
Karte

Dr Bezirk Raete isch e Verwaltigsbezirk vum eschtryychische Bundesland Tirol. Är gränzt im Norde an Bayern (Landkrois Oberallgai, Landkrois Oschtallgai un Landkreis Garmisch-Partenkirchen), im Side an d Tiroler Bezirk Landeck un Imst un im Weschte an Vorarlberg (Bezirke Breagaz un Bluadaz). D Region nännt mer au Außerfern.

Dr Bezirk umfasst s Lechtal, s Tannheimer Tal un s sognännt Zwischetore zwische Reutte un em Fernpass. Dr Bezirk het Aadeil an dr Lechtaler Alpe, am Wättersteigebirg, an dr Allgaier Alpe un dr Ammergauer Alpe. Wichtige Seä sin dr Plansee, dr Heiterwanger See, dr Haldesee, dr Urisee un dr Vilsalpsee.

D Wirtschaft vum Bezirk isch bregt vum Dienschtleischtigssektor un vum industriäll-gwärblige Sektor. Im Beraich vu dr Dienschtleischtig dominiert dr Turismus, vor allem in dr Gebiet Zugspitze, Tannheimer Tal, Plansee, Lechtal un Sytetäler. Greßeri Induschtriizäntre sin Reutte, Elbigenalp, Höfen un Vils, wichtigi Produktionsbetrib het s in dr Beraich Metallinduschtrii un Böugwärb.

Dr Bezirk bildet e gschlossene Arbetsmärt un het e verglyychswyys nidere Uus- un Yypändleraadeil us andere Regione.

Dr Bezirk Raete glideret sich in 37 Gmeine, dervu ei Stadt un ei Märtgmei. In Chlammere stehn d Yywohnerzahle vum 31. Dezämber 2008.

• „Verein Regionalentwicklung Außerfern“ vu dr 37 Gmeine vum Bezirk
• Bezirkshauptmannschaft Reutte

Dä Artikel basiert uff ere fräie Übersetzig vu dere Version vum Artikel „Bezirk_Reutte“ vu de dütsche Wikipedia. E Liste vu de Autore un Versione isch do z finde.