Die Amerikanischi Revolution, au dr Unabhängikeitschrieg vo de Vereinigte Staate, isch dr Ufstand währed de Johr 1775 bis 1783 gsi, wo drizäa vo de nordamerikanische Kolonie vo Grossbritannie ihri Unabhängikeit vo ihrem Mueterland gwunne und die Vereinigte Staate vo Amerika bildet hai.

Dr Chrieg isch usbrooche noch eme Johrzähnt vo politische Händel, wo sich d Koloniste meh und meh vo dr Britische Chrone entfremdet hai, wil die brobiert het, ihri Kontrolle über d Kolonie z versterke. Bis 1778 isch es e Bürgerchrieg innerhalb vom Britische Riich gsi. Denn hai sich anderi europäischi Mächt afo iimische, wo die ufständische Kolonie understützt hai: Frankriich im Johr 1778, Spanie im Johr druf und Holland 1780. Dr Chrieg isch uf em Land vor allem gege d Koloniste gfüehrt worde, und uf de Meer gege die europäische Seemächt. Grossbritannie het dank siner Flotte lang d Understützig, wo vor allem d Franzose gschiggt hai, chönne iischrängge. Dr britische Söldnerarmee si schlächt usbildeti, amerikanischi Soldate und Milize under em George Washington gegenübergstande, wo aber mit dr Hilf vo Duusige vo französische Soldate schliesslig am 19. Oktober 1781 d Kapitulation vo de Änglander z Yorktown hai chönne erzwinge. Die letzte britische Soldate hai New York am 25. Novämber 1783 verloo, nochdäm am 3. Septämber 1783 dr Friide vo Paris abgschlosse worden isch. In däm het Grossbritannie d Unabhängikeit vo de Vereinigte Staate bis zum Mississippi anerkennt und Florida an Spanie abdrätte.