Selfstandige Evangelies-Lutherse Kerk
Die Selfstandige Evangeliese-Lutherse Kerk (SELK) (Duits: Selbständige Evangelisch-Lutherische Kirche) is 'n behoudende Lutherse Kerk in Duitsland. Die administratiewe hoofkwartier, die Kirchenbüro, is in Hannover (deelstaat Nedersakse). Die biskop is Hans-Jörg Voigt.
Die SELK is in 1830 gestig. Die verkose demokratiese bestuursorgane van die SELK is die Sinode.
Geskiedenis
[wysig | wysig bron]
Selfstandige Lutherse minderheidskerke het tussen 1817 en 1880 veral in Pruise, Sakse, Hessen en Hannover ontstaan nadat Lutherse en Gereformeerde kerke in Duitsland deur die staat in 'n gemeenskaplike "Evangeliese Kerk" verenig is. Ook in die 20ste eeu het hierdie "Unie" (Duits: Union) of samesmelting model gestaan vir die daarstelling van een enkele Evangeliese eenheidskerk in Duitsland wat met die Evangeliese Kerk in Duitsland (EKD) verwesenlik is. Baie Lutherane was egter gekant teen hierdie samesmelting.
Hulle het veral aangevoer dat die Lutherse en Gereformeerde leerstellings onversoenbaar met mekaar sou wees en in 'n gemeenskaplike kerkverband nie gelyke regte sou kon geniet nie. Daar is byvoorbeeld na die uiteenlopende Lutherse en Gereformeerde leerstellings oor die Nagmaal verwys.
Om hul suiwer Lutherse leerstellings, belydenis, kerkdiens en selfstandige kerkorganisasie te bewaar - iets wat in die verenigde kerke van die verskillende Duitse lande nie meer moontlik was nie - het baie Lutherane daarna gestrewe om hul selfstandige kerkorde te herstel. Die stigting van suiwer Lutherse kerke is ook deur die Bybelkritiese teologie bevorder wat vanuit die staatsuniversiteite na ander sfere in die Duitse samelewing uitgebrei is. 'n Derde rede vir die afstigting van behoudende Lutherse kerke - veral in die laaste derde van die 19de eeu - was die toenemende invloed wat staatsinstellings op die tradisionele kerkreg uitgeoefen het.
Die huidige SELK is in 1972 met die samesluiting van kleiner selfstandige Lutherse kerke in Wes-Duitsland gevorm. 1991 het ook die Evangelies-Lutherse (Oud-Lutherse) Kerk in die eertydse Duitse Demokratiese Republiek (DDR) by die SELK aangesluit. Sodoende is byna alle Lutherse minderheidskerke in Duitsland in 'n gemeenskaplike kerkverband verenig.
Eksterne skakels
[wysig | wysig bron]Normdata  |
|
|---|
Text is available under the CC BY-SA 4.0 license; additional terms may apply.
Images, videos and audio are available under their respective licenses.
