Rosetta-ruimtetuig
![](https://upload.wikimedia.org/wikipedia/commons/thumb/d/d9/Rosetta.jpg/220px-Rosetta.jpg)
![](https://upload.wikimedia.org/wikipedia/commons/thumb/b/bc/67P_Churyumov-Gerasimenko_-_Rosetta_%2832755885495%29.png/220px-67P_Churyumov-Gerasimenko_-_Rosetta_%2832755885495%29.png)
![](https://upload.wikimedia.org/wikipedia/commons/thumb/c/c0/Trajectoire-Rosetta.svg/220px-Trajectoire-Rosetta.svg.png)
Die Rosetta-ruimtetuig was ’n ruimtetuig van die Europese Ruimteagentskap met ’n landingstuig, Philae, aan boord. Dit is op 2 Maart 2004 gelanseer met die doel om ná ’n 10 jaar lange reis die komeet 67P/Churyumov-Gerasimenko te bereik, daarom te wentel en die landingstuig te ontkoppel om daarop te land. Op 6 Augustus 2014 het die Rosetta, nadat dit 6,4 miljard kilometer afgelê het, uiteindelik sy bestemming bereik. In die proses het dit verskeie kere by die Aarde en Mars verbygeskuur om deur die slingervel-metode te versnel, sodat dit ’n snelheid soortgelyk aan die komeet s'n kon bereik.[1]
Die tuig is genoem na die Rosettasteen, ’n stele van Antieke Egipte met ’n verordening in drie skryfstelsels. Die landingstuig is genoem na die Philae-obelisk, wat ’n tweetalige inskripsie bevat in Grieks en Egiptiese hiërogliewe.
Philae
[wysig | wysig bron]Die Rosetta se landingstuig, Philae, het op 9 November 2014 op die komeet neergestryk. Dit was ’n historiese gebeurtenis aangesien dit die eerste tuig is wat op ’n komeet geland het. Die Philae het twee spronge uitgevoer en die oppervlak dus drie keer in die proses getref. Die eerste sprong was ’n yslike sowat een kilometer hoog, want die komeet se aantrekkingskrag is so gering dat dit nie veel kos om daaraan te ontsnap nie.[2]
Gou was daar egter probleme toe besef is dat die Philae hom ná sy spronge op ’n plek onder ’n krans (of iewers) bevind waar daar bedroef min sonlig kom om sy batterye te herlaai. Daar is gewag om te kyk of die probleem op ’n manier omseil of te bowe gekom sou kon word. Die vooruitsigte het nie baie belowend gelyk nie, hoewel die klein snuffelaar net ná sy landing nog ’n stroom waardevolle inligting na die Aarde kon stuur. As sodanig is die landingsmaneuver as geslaag beskryf.[3]
Philae is wel ook ontwerp om ’n gat in die komeet te boor sodat die samestelling daarvan ontleed sou kon word. Sulke inligting sou vir wetenskaplikes baie waardevol gewees het om die ontstaan van die Aarde en die heelal beter te verstaan.[4] Sonder sonkrag in die Philae egter futloos.
Rosetta
[wysig | wysig bron]Die reis met die Rosetta-omwentelingstuig het nietemin die hoofsending gebly. Dit het – in sy wentelbaan om Churyumov-Gerasimenko – die komeet van November 2014 tot Desember 2015 op sy reis om die Son vergesel. Dit het opnames gemaak van die veranderings wat die komeet ondergaan namate dit nader aan die Son beweeg en die Son se hitte daarop inwerk. Komete is konglomerate van ruimtepuin en ys wat soos "vuil sneeuballe" om die Son wentel in elliptiese bane wat hulle om die beurt baie ver en baie naby aan die Son bring. Dit is wanneer hulle naby aan die Son kom dat die ys begin verdamp en die damp baiemaal lang sterte vorm wat besonder skouspelagtig kan wees.
Omdat die komeet al hoe verder van die Son af beweeg in sy wentelbaan, sou die krag wat Rosetta se sonpanele opwek algaande te min geword het om die tuig doeltreffend te laat werk. Op 30 September 2016 is die Rosetta se sending beëindig deur dit in die Ma'at-streek van die komeet te laat land.[5][6]
Galery
[wysig | wysig bron]-
Uitsig op die landings-
terrein op 30 km afstand. -
Die komeet soos op 8 Augustus 2014 deur Rosetta afgeneem.
-
Philae-landingstuig na skeiding van Rosetta (kunstenaar se voorstelling).
-
Kunstenaar se voorstelling van Philae se landing.
Verwysings
[wysig | wysig bron]- ↑ Video: Na tien jaar is ruimtetuig by komeet, Maroela Media, 6 Augustus 2014
- ↑ One giant bounce for mankind, Mail Online, 17 November 2014
- ↑ Philae: 'It's done what it went there to do', BBC News, 15 November 2014
- ↑ Tuig veilig op komeet, Maroela Media, 13 November 2014
- ↑ Aron, Jacob (30 September 2016). "Rosetta lands on 67P in grand finale to two year comet mission". New Scientist (in Engels). Geargiveer vanaf die oorspronklike op 8 April 2020. Besoek op 1 Oktober 2016.
- ↑ Gannon, Megan (30 September 2016). "Goodbye, Rosetta! Spacecraft Crash-Lands on Comet in Epic Mission Finale". Space.com (in Engels). Geargiveer vanaf die oorspronklike op 10 Mei 2020. Besoek op 1 Oktober 2016.
Eksterne skakels
[wysig | wysig bron]Wikimedia Commons het meer media in die kategorie Rosetta-ruimtetuig.
- Amptelike webtuiste
Text is available under the CC BY-SA 4.0 license; additional terms may apply.
Images, videos and audio are available under their respective licenses.