Turkye, amptelik die Republiek van Turkye, is 'n land in Eurasië wat strek oor die Anatoliese Skiereiland in Wes-Asië en die Balkangebied van Suid-Europa. Die land grens aan die Swartsee in die noorde, die Egeïese See in die weste en die Middellandse See in die suide.

Die streek waaruit die moderne Turkye vandag bestaan, was die geboorteplek van baie beskawings, onder meer die Bisantynse- en die Ottomaanse Ryk. Vanweë sy strategiese ligging op die grens van twee kontinente is die Turkse kultuur ’n unieke vermenging van die Ooste en die Weste en word ook dikwels na die land verwys as die brug tussen die twee beskawings.