Nuwe Nasionale Operahuis (Oslo)
![](https://upload.wikimedia.org/wikipedia/commons/thumb/f/f0/Opera_House_Norway_200804_2.jpg/220px-Opera_House_Norway_200804_2.jpg)
![](https://upload.wikimedia.org/wikipedia/commons/thumb/e/e8/OsloOperaBj%C3%B8rvika2008-03-25-11.jpg/220px-OsloOperaBj%C3%B8rvika2008-03-25-11.jpg)
![](https://upload.wikimedia.org/wikipedia/commons/thumb/6/6f/OsloOperaBj%C3%B8rvika_2007-08-26-05.jpg/220px-OsloOperaBj%C3%B8rvika_2007-08-26-05.jpg)
![](https://upload.wikimedia.org/wikipedia/commons/thumb/1/11/OsloOperaBj%C3%B8rvika2008-03-25-10.jpg/220px-OsloOperaBj%C3%B8rvika2008-03-25-10.jpg)
![](https://upload.wikimedia.org/wikipedia/commons/thumb/0/02/OsloOperaBj%C3%B8rvika2008-03-25-04.jpg/220px-OsloOperaBj%C3%B8rvika2008-03-25-04.jpg)
![](https://upload.wikimedia.org/wikipedia/commons/thumb/7/7f/New_Opera_in_Oslo.jpg/220px-New_Opera_in_Oslo.jpg)
Die Nuwe Nasionale Operahuis in die Noorse hoofstad Oslo is sedert April 2008 die tuiste van Den Norske Opera & Ballet.
Geskiedenis
[wysig | wysig bron]Nadat die debat oor die oprigting van 'n nuwe operahuis in Oslo al dekades lank gevoer is, is die eerste bouplanne vir die ambisieuse gebou van beton, marmer en glas in 1998 aan die publiek bekend gestel. Twee alternatiewe persele by die voormalige Vestbanestasjonen (die westelike stasie van Oslo) en in die ou Folketeater-gebou is uiteindelik verwerp, en die Noorse parlement, die Storting, het op 15 Junie 1999 die besluit geneem om die nuwe operahuis net soos die Sydney Opera House digby die hawe op te rig. Volgens die amptelike beplanning sal die Oslo-operahuis tot die middelpunt van die nuwe stadsbuurt Bjørvika suidoos van Oslo se hoofstasie ontwikkel.
Die boubedrywighede het op 17 Februarie 2003 amptelik begin, terwyl die hoeksteen van die nuwe gebou in die najaar van 2004 gelê is. Die inwyding van die operahuis is oorspronklik vir September 2008 beplan, maar aangesien die boubedrywighede al maande vroeër voltooi is, het die plegtige inwyding vyf maande voor die beplande datum plaasgevind. Die boukoste het 4,13 miljard Noorse kroon (6,5 miljard ZAR) beloop.[1]
Argitektuur
[wysig | wysig bron]![](https://upload.wikimedia.org/wikipedia/commons/thumb/c/cd/OsloOperaBj%C3%B8rvika2008-03-25-09.jpg/220px-OsloOperaBj%C3%B8rvika2008-03-25-09.jpg)
Die Nuwe Nasionale Operahuis word as die grootste kulturele projek in die na-oorlogse Noorweë beskou. Die gebou, wat soos 'n gletser, 'n drywende ysberg en sneeu - tipiese natuurverskynsdels van die noorde van Noorweë - lyk, is deur die Noorse Snøhetta-argitekte ontwerp wat reeds bekendheid met hulle argitektoniese konsep vir die Nuwe Biblioteek van Alexandrië in Egipte verwerf het.
Die operahuis het 'n wydte van 100 meter, 'n lengte van 207 meter en beskik met sy oppervlakte van 38 500 vierkante meter oor meer as 1 500 vertrekke. Naas twee kleiner tonele bied die hooftoneel sitplekke vir 1 358 toeskouers. Die Groot Saal, wat met Duitse eikehoutpanele uitgelê is, pronk met die grootste ligkroon in Noorweë wat deur Snøhetta in samewerking met Hadeland Glassverk geskep is. Die ligkroon het 'n deursnee van sewe meter en 'n gewig van 8,5 ton. 8 500 hipermoderne ligdiodes word as ligbron ingespan.
Die fasade van die operahuis bestaan uit 90 persent wit Italiaanse Carrara-marmer en tien persent Noorse graniet wat in Rennebu ontgin is. Die massiewe gebruik van wit marmer is omstrede, en reeds voor die amptelike inwyding van die gebou het sommige van die sowat 36 000 marmerplate om onbekende redes geel verbleek. Die probleem is waarskynlik aan die koel en vogtige klimaat van Oslo te wyte.
Inwyding
[wysig | wysig bron]Die operahuis is op 12 April 2008 plegtig ingewy. Die plegtige seremonie is regstreeks op die Norse televisie NRK uitgesaai en dwarsdeur die land as 'n kulturele gebeurtenis van nasionale belang gevier. Die sowat 1 400 eregaste by die inwyding het die Noorse koning Harald V en sy eggenote koningin Sonja, verteenwoordigers van die Deense en Sweedse koningshuise, die eerste ministers van Ysland en Finland en die Duitse bondskanselier Angela Merkel ingesluit.[2]
Twintig solosangers en sestig dansers het by die openingsgala opgetree; die aanbiedings het onder meer uitreksels uit Richard Wagner se opera Der Fliegende Holländer ingesluit. Aangesien die ingewikkelde tegniek van die toneel nie betyds geïnstalleer kon word nie, is die opvoering van Jorden rundt på 80 dager, 'n opera van die Noorse komponis Gisle Kverndokk, tot aanstaande jaar uitgestel. [3]
Verwysings
[wysig | wysig bron]- ↑ Die webwerf van Statsbygg
- ↑ Skandinavische Operngala – Oslo stellt sein neues Opernhaus vor dw-world.de, 10 April 2008
- ↑ Merkels modischer Coup d'État Der Spiegel, 13 April 2008
Eksterne skakels
[wysig | wysig bron]- Die webwerf van die Noorse Opera
- Peter Richter: Unter den Marmorklippen. Das neue Opernhaus in Oslo, in: Frankfurter Allgemeine Sonntagszeitung, 16 Maart 2008, bl. 29
![]() |
Wikimedia Commons bevat media in verband met Die Oslo-operahuis. |
Text is available under the CC BY-SA 4.0 license; additional terms may apply.
Images, videos and audio are available under their respective licenses.