Noordwes-provinsie
Bokone-Bophirima
Nyakatho-Ntshonalanga
North West Province

Wapen
Oppervlakte	104 882 km²
Bevolking (2011)[1]	3 509 953
Bevolking (2017 skat)	3 850 000
Tale[1]	Tswana (63,4%), Afrikaans (9,0%), Suid-Sotho (5,8%), Xhosa (5,5%), Tsonga (3,7%)
Etniese groepe[1]	Swart mense (89,8%), Wit mense (7,3%), Bruin mense (2,0%), Asiërs (0,6%)
Hoofstad	Mahikeng
Premier	Bushy Maape (ANC)

Noordwes (Engels: North West, Tswana: Bokone-Bophirima) is een van die nege provinsies van Suid-Afrika. Die hoofstad is Mahikeng (heet tot onlangs Mafikeng en nog algemeen gebruik). Noordwes is in 1994 gevorm deur die samevoeging van die ou Wes-Transvaal en die "tuisland" Bophuthatswana (uitgesluit die deel wat in die Vrystaat geleë was) en 'n noordoostelike deel van die ou Kaapprovinsie.

Die provinsiale hoofstad Mahikeng vorm 'n eenheid met Mmabatho, wat voorheen die hoofstad van Bophuthatswana was.

Ander belangrike dorpe in Noordwes is onder meer Potchefstroom, Klerksdorp, Brits, Rustenburg, Lichtenburg en Vryburg.

• Bevolking (2007-sensus): 3 394 200.
• Tale: Tswana (63,4%), gevolg deur Afrikaans (9,0%).

Daar is 4 distrikte in die provinsie, naamlik:

• Bojanala Platinum
• Ngaka Modiri Molema (voorheen Sentrale)
• Dr. Kenneth Kaunda (voorheen Suidelike)
• Dr. Ruth Segomotsi Mompati (voorheen Bophirima)

• Oppervlakte: Sowat 104 882 vk. km.

Noord en wes van Noordwes lê die land Botswana, terwyl die provinsies Noord-Kaap en Vrystaat aan die suidekant, Limpopo na die noordooste en Gauteng aan die oostekant daarvan lê. Die Magaliesbergreeks is in die noordooste, en die Vaalrivier vorm die provinsie se suidelike grens. Noordwes se suidelike deel is 'n uitgestrekte vlakte, terwyl die noordelike deel grootliks yl begroeide bosveld is.

Mynbou sorg vir meer as 'n derde van Noordwes se bruto binnelandse produk. Nagenoeg 94% van Suid-Afrika se platinum kom van die distrikte Rustenburg en Brits, wat meer van hierdie kosbare silwerwit metaal produseer as enige ander gebied ter wêreld. Die provinsie lewer voorts 'n kwart van die land se goud. Graniet, marmer, vloeispaat en diamante word ook ontgin.

Ondanks die mynboubedrywighede het die provinsie nog steeds 'n landelike karakter. Noordwes lewer sowat 'n derde van die land se mielies. Ander belangrike landbouprodukte in die suidelike en oostelike dele van die land is sonneblomolie, vrugte, tabak en katoen. Die westelike en noordelike dele het weer baie skaap- en beesplase.

Noordwes se malariavrye wildernisgebiede soos die Madikwe Wildreservaat en die Nasionale Pilanesbergpark is gewilde toeristebestemmings. So ook Sun City, 'n bekende luukse vakansieoord wat met twee gholfbane, kasino's, sportgeriewe en ander vermaaklikheidsaktiwiteite daagliks meer as 25 000 besoekers lok. Ander gewilde bestemmings vir buitelug-aktiwiteite is die Hartbeespoortdam (vir watersport) en die Magaliesberge met sy natuurskoon en voetslaanpaaie.

Die Noordwes-Universiteit, wat die Potchefstroomkampus (die Pukke) insluit, is die provinsie se vernaamste tersiêre onderwysinrigting.

• Noordwes by Mieliestronk - Met toestemming gebruik

Wikimedia Commons bevat media in verband met Noordwes.

Sien noordwes in Wiktionary, die vrye woordeboek.

• (en) Toerisme-inligting oor Noordwes op Wikivoyage
• (en) Amptelike webwerf

Provinsies van Suid-Afrika
Gauteng | KwaZulu-Natal | Limpopo | Mpumalanga | Noord-Kaap | Noordwes | Oos-Kaap | Vrystaat | Wes-Kaap

l b w Munisipaliteite van Noordwes
Distriksmunisipaliteite en hul Plaaslike Munisipaliteite	Bojanala Platinum Moretele · Madibeng · Rustenburg · Kgetlengrivier · Moses Kotane Ngaka Modiri Molema Tswaing · Mahikeng · Ditsobotla · Ramotshere Moiloa · Ratlou Dr Ruth Segomotsi Mompati Naledi · Mamusa · Groter Taung · Lekwa-Teemane · Kagisano-Molopo Dr Kenneth Kaunda JB Marks · Matlosana · Maquassi Hills

27°S 26°O / 27°S 26°O / -27; 26