Karakoram
- Hierdie artikel handel oor die bergreeks in Sentraal-Asië. Vir die ou hoofstad van die Mongoolse Ryk, sien Karakoroem.
Die Karakoram (Chinees: 喀喇崑崙山脈; Hindi: काराकोरम पर्वतशृंखला; Oerdoe: سلسلہ کوہ قراقرم) is 'n bergreeks in Sentraal-Asië aan die kruispunt van die Himalaja met die Tiensjan, Pamir, Kunlun en Hindoekoesj op die omstrede grense van Afghanistan, Indië, Pakistan, Tadjikistan en die Volksrepubliek China. Die hoogste bergpiek, K2, is met 8 614 meter bo seevlak die tweede hoogste berg ter wêreld net na Berg Everest. Die drie ander berge met 'n hoogte van meer as 8 000 m is Gasherbrum I (8 080 m), Broad Peak (8 051 m) en Gasherbrum II (8 035 m), almal op die omstrede grens tussen Pakistan en Xinjiang (Volksrepubliek China).
Karakoram is 'n Turkse term wat "swart gruis" beteken. In antieke Sanskrittekste (Puranas) word na dié bergreeks met die naam Krishnagiri ("swart berge") verwys.[1][2]
Die Karakoram word deur die Indusvallei van die Himalaja in die suide geskei, deur die Amoedarja van die Pamir in die noordweste en in die noordooste deur die Tarimrivier van die Tarimbekken. Daarbenewens grens dit in die weste aan die Hindoekoesj en in die ooste aan die Kunlun.
Die Karakoram streek oor sowat 700 km en is tussen 100 en 150 km breed. Dit is die mees bevrore deel van die wêreld buite die poolstreke. Die Siachen-gletser met 76 km en die Biafo-gletser met 63 km is onderskeidelik die tweede en derde langste gletsers buite die poolstreke.[3]
Verwysings
[wysig | wysig bron]- ↑ (en) Raza, Moonis; Ahmad, Aijazuddin; Mohammad, Ali (1978), The Valley of Kashmir: The land, Vikas Pub. House, ISBN 978-0-7069-0525-0, https://books.google.com/books?id=nQ08AAAAMAAJ
- ↑ (en) Chatterjee, Shiba Prasad (2004), Selected Works of Professor S.P. Chatterjee, Volume 1, National Atlas and Thematic Mapping Organisation, Department of Science and Technology, Government of India, https://books.google.com/books?id=ZOOHZ2Hu_QEC
- ↑ (en) Jerzy Wala,Orographical Sketch Map: Karakoram: Sheets 1 & 2, Swiss Foundation for Alpine Research, Zurich, 1990.
Eksterne skakels
[wysig | wysig bron]
Wikimedia Commons het meer media in die kategorie Karakoram.- (en) "Karakoram Range". Encyclopædia Britannica. Besoek op 8 Februarie 2019.
Text is available under the CC BY-SA 4.0 license; additional terms may apply.
Images, videos and audio are available under their respective licenses.
