’n Impakwinter is ’n uitgerekte tydperk van koue weer weens die botsing van ’n groot asteroïde of komeet met die Aarde. As ’n hemelliggaam die Aarde op land of in vlak water sou tref, sou dit ’n enorme hoeveelheid stof, as en ander materiaal die lug inwerp en dit sou die Son se lig afkeer. Dit sou die temperatuur oor die hele Aarde drasties laat daal.^[1][2]

As ’n hemelliggaam met ’n deursnee van 5 km of meer die Aarde in diep water sou tref of sou ontplof voor dit die oppervlak tref, sou daar steeds ’n enorme hoeveelheid afval die lug ingewerp word.^[1][3][2] Daar word gemeen ’n impakwinter kan tot ’n massauitwissing lei en baie van die spesies op Aarde laat uitsterf.