Havelland
![](https://upload.wikimedia.org/wikipedia/commons/thumb/d/dc/Havelland.svg/220px-Havelland.svg.png)
Havelland is 'n geografiese term wat verskillende betekenisse kan hê. In geografiese opsig is dit 'n gebied in die Duitse deelstaat Brandenburg tussen die stede Oranienburg in die noordooste en Rhinow in die noordweste, met die Rhinrivier en die Rhinkanaal as sy noordelike grens. Die Havelrivier vorm 'n perdehoef om dié streek wat in die geskiedenis van Brandenburg 'n rol as historiese landskap gespeel het.
Vir die plaaslike Havelland e.V.-bemarkings- en toerismevereniging behels die Havelland as landskap die gelyknamige administratiewe distrik, die stad Brandenburg an der Havel en die noordelike deel van die distrik Potsdam-Mittelmark insluitende die nedersettings suid van die Havel wat andersins by die landskap Zauche gereken word.
Die administratiewe distrik Havelland behels die kerngebied van die Havelland, terwyl die suidelike deel van die Ruppiner Land met die Rhinluch, die westelike deel van die Berlynse distrik Spandau, die stede Potsdam en Brandenburg an der Havel net soos enkele nedersettings in die distrik Potsdam-Mittelmark buite die distrik Havelland geleë is.
Havelland is een van die Brandenburgse streke wat deur die skrywer Theodor Fontane in 'n boekdeel van sy reeks Wanderungen durch die Mark Brandenburg behandel word. Dit het daarnaas danksy Fontane se ballade Herr von Ribbeck auf Ribbeck im Havelland bekendheid verwerf, en ook sy romankarakter Effi Briest word hier grootgemaak.
Text is available under the CC BY-SA 4.0 license; additional terms may apply.
Images, videos and audio are available under their respective licenses.