Fingo-melkhoutboom
Die Fingo-melkhoutboom (Umqwashu) is van historiese belang vir die Fingo-volk. Die boom is 13 km noordnoordwes van Peddie, op die pad van Peddie oor Breakfastvlei en Fort Willshire na Alice en Fort Beaufort.
Tydens die Mfecane het die Fingo vroeg in die 1820's van Natal na Transkei gevlug. Weens onophoudelike aanvalle deur die Xhosa het die Fingo al verder wes gevlug tot net wes van die Keiskammarivier. Op 14 Mei 1835 het hulle by 'n groot melkhoutboom, die Umqwashu, stilgehou en onder die leiding van eerw. John Ayliff trou gesweer aan God en die Britse koning. Die Umqwashu is sedertdien vir die Fingo-vlolk 'n simbool van verlossing uit die slawerny.
Hierdie boom is in 1942 tot monument verklaar en vir lange jare het die Fingo hier op 14 Mei bymekaargekom vir 'n herdenkingsgeleentheid.
Aan drie ander melkhoutbome is die status van monument verleen, naamlik die Poskantoorboom by Mosselbaai, die Verdragboom by Woodstock en die Renosterfontein-melkhoutboom by Bredasdorp.
Bibliografie
[wysig | wysig bron]- Oberholster, J.J.: Die historiese monumente van Suid-Afrika. Kaapstad: Kultuurstigting Rembrandt van Rijn vir die Raad vir Nasionale Gedenkwaardighede, 1972. ISBN 0-620-00191-7
Text is available under the CC BY-SA 4.0 license; additional terms may apply.
Images, videos and audio are available under their respective licenses.
