Dene Smuts
Dene Smuts in 2011
Skaduminister van Justisie en Grondwetlike Ontwikkeling
Ampstermyn 2009 – 2014
Opgevolg deur	Glynnis Breytenbach
Persoonlike besonderhede
Gebore	(1949-07-13)13 Julie 1949 Bloemfontein, Vrystaat
Sterf	21 April 2016 (op 66) Kaapstad, Wes-Kaap
Politieke party	Demokratiese Alliansie
Alma mater	Universiteit Stellenbosch

Mudene Smuts (noemnaam Dene, Bloemfontein, 13 Julie 1949 – Kaapstad, 21 April 2016) was 'n Suid-Afrikaanse tydskrifredakteur en parlementslid van die Demokratiese Party en die Demokratiese Alliansie.

Smuts is in Bloemfontein gebore en getoë. Haar vader was regter Frank Smuts. Dene het haar skoolloopbaan voltooi aan die C&N Meisieskool Oranje waar sy reeds uitgeblink het. Ná skool het sy ’n B.A. (Hons.) aan die Universiteit Stellenbosch behaal waar sy in die studenteraad gedien het. Sy betree die joernalistiek as verslaggewer by die Kaapse dagblad Die Burger. Later was sy redakteur van die Naspers-vrouetydskrif Fair Lady. Haar bedanking was een van die opspraakwekkendste deur ’n redakteur in Suid-Afrika. Sy is oornag by die tydskrif weg nadat die Nasionaalgesinde bestuur haar verbied het om ’n artikel te plaas wat die Nasionale Party ’n grenssetel in ’n algemene verkiesing kon kos.^[1] Daarna was sy besturende redakteur van die meningsblad Leadership. Smuts was ook ’n bekroonde skrywer.

In die algemene verkiesing op 6 September 1989 het Smuts die veilige opposisiekiesafdeling Groote Schuur vir die toe vyf maande oue Demokratiese Party gewen. Sy was ’n voorstander van spraakvryheid en onder andere skaduminister van uitsaaiwese en telekommunikasie vir die DP. Tydens KODESA was Smuts een van die DP se afgevaardigdes wat moes verseker dat dié party se liberale waardes in die nuwe Grondwet vervat word. In 1992 het sy die eerste vroulike sweep in die parlement geword en van 1994 tot 1997 as die DP se partyvoorsitter opgetree.

In die eerste demokratiese verkiesing op 27 April 1994 was Smuts een van net sewe LP’s van die DP wat die paal gehaal het en die enigste vrou. Sy het onder andere gedien as DP-woordvoerder oor die Waarheid-en-versoeningskommissie, die Grondwet en menseregte. Smuts het meegehelp aan die opstel van die Handves van Menseregte in die Grondwet. Ná die stigting van die Demokratiese Alliansie in Junie 2000 was sy dié party se woordvoerder oor justisie en grondwetlike ontwikkeling.

Sy was gekant teen die DP se samesmelting in 2000 met sy aartsvyand, die Nuwe Nasionale Party, ten einde die DA te vorm, maar het haar later daarin berus en as DA-LP gedien tot 2014, toe sy uit die openbare lewe getree het.

Smuts het haar dogter, Julia, op Donderdag 21 April 2016 gebel en gekla oor 'n kwaai borspyn. Teen die tyd dat Julia haar ma se huis in Kenilworth in Kaapstad se suidelike voorstede bereik het, was sy reeds oorlede. Sy word ook oorleef deur ’n seun, wat ’n ingenieur is.

• (en) Liberal stalwart Dene Smuts dies, TimesLive.co.za, 22 April 2016. URL besoek op 22 April 2316.
• (en) Former DA MP Dene Smuts has died, EWN.co.za, 22 April 2016. URL besoek op 22 April 2016.