Cockermouth
Cockermouth | |
---|---|
Markdorp | |
![]() Terrashuise in Bank Court | |
Koördinate: 54°40′00″N 3°22′00″W / 54.66667°N 3.36667°W | |
Land | ![]() |
Land | Engeland |
Graafskap | Cumbria |
Bevolking | |
• Totaal | 7 877 |
Tydsone | UTC+00:00 (MGT) |
• Somertyd | UTC+01:00 (BST) |
Poskode | CA13 |
Skakelkodes | 01900 |
Webwerf | cockermouth.org.uk |
![](https://upload.wikimedia.org/wikipedia/commons/thumb/a/aa/All_Saints_Church%2C_Cockermouth_-_geograph.org.uk_-_474536.jpg/220px-All_Saints_Church%2C_Cockermouth_-_geograph.org.uk_-_474536.jpg)
![](https://upload.wikimedia.org/wikipedia/commons/thumb/f/fc/Wordsworth_House_2015_2.jpg/220px-Wordsworth_House_2015_2.jpg)
![](https://upload.wikimedia.org/wikipedia/commons/thumb/1/12/Calm_Before_no_Storm_%2819725538945%29.jpg/220px-Calm_Before_no_Storm_%2819725538945%29.jpg)
![](https://upload.wikimedia.org/wikipedia/commons/thumb/0/00/River_Cocker_-_geograph.org.uk_-_461344.jpg/220px-River_Cocker_-_geograph.org.uk_-_461344.jpg)
![](https://upload.wikimedia.org/wikipedia/commons/thumb/2/2d/Loweswater_-_panoramio_%283%29.jpg/220px-Loweswater_-_panoramio_%283%29.jpg)
Cockermouth [ˈkɒkɚməθ] is 'n historiese markdorp en civil parish in die Noord-Engelse graafskap Cumbria wat bekendheid verwerf het as die geboorteplek van die digter William Wordsworth. Sy Georgiaanse geboortehuis met tuin, Wordsworth House & Gardens, in Main Street is in besit van die National Trust. William Wordsworth het hier saam met sy ouers, sy suster Dorothy, drie broers en bediendes gewoon. Interieur en meubilering gee 'n indruk van die lewe in die 1770's. Ses jaar voor Wordsworth is ook Fletcher Christian, een van die Bounty-muiters, in 1764 op 'n plaas buite Cockermouth gebore.
Die dorp is geleë in die Meredistrik (Lake District) wat as een van die mooiste streke in Engeland beskou word. Die Council for British Archaeology het reeds in 1965 die beskerming van Cockermouth as deel van die nasionale kultuurerfenis aanbeveel.
Cockermouth se ligging by die samevloeiing van twee riviere, Cocker en Derwent, beteken dat die dorp steeds weer met oorstromings te kampe het. Sy geografiese ligging naby die Solway Coast (sewe myl) en die grens met Skotland (dertig myl) maak van Cockermouth die ideale wegspringplek vir toere in Noordwes-Engeland en Suidwes-Skotland.
Klimaat
[wysig | wysig bron]Cockermouth word onder die plekke in die Verenigde Koninkryk gereken wat al drie soorte van reën ontvang - konveksie-, reliëf- en frontale reën. Sy ligging aan die weskus van Noord-Engeland beteken dat dit een van die eerste gebiede is waar neerslae van laedrukgebiede, wat vanuit die Atlantiese Oseaan oor Groot-Brittanje beweeg, gereeld as frontale reën uitsak. Die betreklik hoë reliëf van die Meredistrik laat ook reliëfreën oor die gebied uitsak sodra vogtige lugmassas, wat vanuit die Atlantiese Oseaan en die Ierse See ooswaarts beweeg, hier kondenseer. Konveksiereën kom eweneens voor as gevolg van die gebied se ligging naby die watermassas van die Ierse See en die omliggende mere. Op baie warm somerdae verdamp water wat dan as konveksiereën val.
Geskiedenis
[wysig | wysig bron]Die gebied was van strategiese belang as grensstreek, in die Romeinse tydperk sowel as in die Middeleeue. 'n Romeinse fort, Derventio, was buite Cockermouth se huidige dorpsgebied geleë. Reeds in 1221 is markregte aan Cockermouth toegeken.
Ekonomie
[wysig | wysig bron]Toerisme speel 'n belangrike rol, veral in die somermaande. Cockermouth is sedert 1874 die setel van die Jennings-brouery. Die brouery, wat naby die Cockermouth-kasteel (dele daarvan is ruïnes, ander word steeds bewoon en is gewoonlik nie toeganklik vir die publiek nie, behalwe vir die Heritage Open Days) geleë is, brou gewilde ales volgens die Engelse tradisie soos Atomic Theory (India Pale Ale IPA), Cumberland (Bitter), Sneck Lifter (Extra Strong Bitter ESB), Night Vision (Amber Beer), Fine Line (Pale Ale) en Cocker Hoop (Pale Ale), sowel as die winterbier Soggy Bottom (Bitter). Inheemses verwys na die nat heuwels en ander hoër geleë terrein (in Noordwes-Engeland fells genoem) in die wintermaande as soggy bottoms. Hierdie term het in ander dele van Engeland 'n afwykende betekenis en word as aanstootlik beskou.
Susterstede
[wysig | wysig bron]Marvejols, Frankryk
Text is available under the CC BY-SA 4.0 license; additional terms may apply.
Images, videos and audio are available under their respective licenses.