Jean Nicolas Arthur Rimbaud ([aʁtyʁ ʁɛ̃bo]; * 20 Oktober 1854 in Charleville, † 10 November 1891 in Marseille) was 'n Franse digter, avonturier en sakeman wat tans as een van die belangrikste persoonlikhede in die Franse digkuns beskou word en met sy werke invloed op die moderne literatuur en kunste uitgeoefen asook 'n verskeidenheid musikante geïnspireer het.

Rimbaud, na wie dikwels as een van die voorlopers van surrealisme verwys word, het op 'n jong ouderdom begin om gedigte te skryf. Sy eerste werke het tydens sy laerskooljare ontstaan, maar nog voor sy 21ste verjaardag het hy sy pen neergelê. So het sy werke binne 'n kort tydperk van minder as vyf jaar ontstaan.

Sy laat tienerjare word as Rimbaud se kreatiefste periode beskou. Sy genius, die bloeitydperk van sy digkuns, die ontploffing en skielike einde van sy digtersloopbaan word in biografieë as verrassend beskryf.^[1] Rimbaud het as vrygees en rustelose siel bekendgestaan. Hy het uitgestrekte reise op drie vastelande onderneem voordat hy kort ná sy 37ste verjaardag aan kanker oorlede is.